BACOOR CITY, Cavite, Philippines — Pinagsasaksak ng isang balut vendor ang isang Toktok rider habang ito ay naglalakad pauwi, kahapon ng madaling araw sa Brgy. Molino 3 ng lungsod na ito.
Ang biktima na idineklarang dead-on-arrival sa ospital dahil sa rami ng tinamong saksak sa iba’t ibang bahagi ng katawan ay nakilalang si Christopher Del Rosario, alias Akong, 37, Toktok rider, residente ng #351, Brgy. Molino 3, Bacoor City.
Tumakas ang suspek matapos ang isinagawang krimen na nakilala ng mga saksi dahil ito ay laging naglalako ng tinda nitong balut sa lugar.
Sa imbestigasyon, alas-12:20 ng madaling araw ay naglalakad pauwi ang biktima sa Esguerra Compound ng nasabing barangay nang sumulpot ang suspek na armado ng patalim at sunud-sunod na inundayan ng saksak ang biktima kahit na ito ay nakabulagta na.
Hinala ng pulisya na matindi ang galit ng suspek sa biktima at inaalam pa kung nagkaroon ang mga ito nang pag-aaway.