2 trader tiklo sa pekeng sigarilyo

CABANATUAN CITY, Nueva Ecija, Philippines — Arestado ang dalawang negos­yanteng lalaki makaraang mahuling nagbebenta ng mga pekeng sigarilyo sa magkahiwalay na bayan ng lalawigang ito, noong Huwebes.

Ayon kay P/Col. Jaime Santos, provincial director ng Nueva Ecija Police, naaktuhan ng mga kagawad ng San Leonardo at Gabaldon Police na nagbebenta umano ng mga pekeng sigarilyo sina Joseph Suguitan, 46, may-asawa ng Sarrat, Ilocos Norte; at Allan Balicao, 42, may-asawa ng Barangay Dampulan, Jaen, Nueva Ecija. Ayon sa San Leo­nardo Police, alas-9 ng gabi noong Huwebes habang nagpapatrolya ang ilan nilang miyembro sa mga barangay ay nati­yempuhan ang suspek na si Suguitan na nagbebenta umano sa isang tindahan sa Brgy. Diversion Road ng mga pekeng Mighty cigarettes.

Apat na kahon ng nasabing brand ng si­garilyo na nagkakahalaga ng P60,000  na nakasakay sa Chevrolet Trailblazer (NBD9966) ang kinum­piska ng pulisya makaraang walang maipakitang kaukulang dokumento ang dayong negosyante.

Ayon naman sa Gabaldon Police, ala-1 ng Huwebes ng hapon nang mabisto ng kanilang mga kagawad na nagbebenta ng pekeng Two Moon cigarette si Balicao sa isang tindahan sa may Sitio Du­pinga, Barangay Malinao.

Nakatakas umano ang isang kasabwat ni Balicao sakay ng motorsiklo subalit nakumpiska ng pulisya kay Balicao ang may 15-reams ng peke umanong Two Moon na nagkakahalaga ng P3,750 at walang papeles.