Taksil na misis, kinatay ni mister
MANILA, Philippines — Dahil sa matinding panibugho nang madiskubreng may kalaguyo, pinagsasaksak hanggang sa mapatay ng isang mister ang sarili nitong misis sa Brgy. Poblacion, Mahayag, Zamboanga del Sur nitong Sabado ng madaling araw.
Kinilala ni P/Captain Edwin Duco, spokesman ng Police Regional Office (PRO) 9 ang nasawing biktima na si Elma Monterola Remitar, 51, residente sa nasabing lugar.
Nahaharap naman sa kasong parricide ang tumakas na suspek na si Eduardo Remitar, 51, isang empleyado sa munisipyo ng nasabing bayan.
Batay sa imbestigasyon, dakong alas-4 ng madaling araw komprontahin ng mister ang misis matapos umano niyang matuklasang nangangaliwa ang huli na kumabit sa ibang lalaki.
Dahil dito, nagkaroon ng mainitang pagtatalo ang mag-asawa hanggang sa pagsasaksakin ng nasabing mister sa dibdib ang kanyang misis na agarang kumitil sa buhay nito.
Dahil naman sa kalabugan ay tinungo ng anak ng mag-asawa na si Mary Eldyn ang silid ng mga magulang at halos napasigaw siya nang makitang duguan ang ina sa ibabaw ng kama at wala nang buhay.
Humingi naman ng tawad ang kaniyang ama na hawak pa ang duguang kutsilyo sa anak sa pagsasabing nagawa niya ang krimen matapos na madiskubreng pinagtataksilan siya ng kanyang misis.
- Latest
