TUGUEGARAO CITY, Philippines — Nanawagan si Cagayan Governor Manuel Mamba na pera na lamang ang ibigay na ayuda sa mga magsasakang sinalanta ng mga nagdaang bagyo sa halip na binhi at pataba.
Idinirekta ni Mamba ang kanyang panawagan sa Department of Agriculture na nagpahayag ng P846 milyong ayuda na ipapaabot nito sa sektor ng agrikultura sa lalawigan.
Ayon kay Mamba, makabubuting ibigay ng kagawaran ang cash na tulong sa mga benepisyaryong magsasaka upang sila mismo ang makakapamili kung anong klaseng binhi at pataba ang kanilang gagamitin.
Aniya, mas makakatulong kung sa lokal na supplier bibili ang mga magsasaka nang umangat naman ang ekonomiya sa lalawigan sa halip na manggaling pa ang ang supply mula sa ibang lugar gaya ng Metro Manila.
Matatandaan na inihayag ni Agriculture Secretary William Dar ang halaga ng ayuda nitong itinuon sa rehiyon noong nakaraang pagbisita ni Pangulong Rodrigo Duterte sa Cagayan.
Bukod sa P846 milyon sa Cagayan, ang Isabela ay tinuunan ng mas malaking halaga na P986 milyon dahil sa mas malawak na pananim na sinalanta ng bagyo roon habang may P148 milyon ang Nueva Viscaya at P96 milyon naman sa Quirino.