Kagawad itinumba ng berdugo

TUGUEGARAO CITY, Cagayan, Philippines — Utas ang isang 56-anyos na barangay kagawad matapos pagbabarilin ng riding-in-tandem assassins habang pauwi sakay ng kanyang motorsiklo sa Barangay Naguilian,  Caoayan, Ilocos Sur noong Huwebes. 

Si Kagawad Valentin Panela ay sinikap pang isugod ng mga sumaklolo sa Ilocos Sur Provincial Hospital Gabriela Silang pero idineklarang patay dahil sa tinamong mga tama ng bala sa iba’t ibang bahagi ng katawan. 

Ayon sa report, pauwi galing ihatid ni Panela ang kanyang misis na isang kawani sa Vigan City Hall nang abangan at pinagbabaril ng mga berdugo dakong alas-8:30 ng umaga. 

Apat na basyo ng bala ng cal.45 ang narekober sa lugar habang inaalam pa ng awtoridad ang motibo sa pamamaslang.