NUEVA ECIJA, Philippines — Arestado ang 10 kataong nag-iinuman at nagkakantahan sa loob ng isang videoke bar kabilang ang umano’y may-ari ng establisimyento sa isinagawang sorpresang pagbisita ng pulisya sa lugar, noong Sabado ng gabi sa Barangay Alula sa bayan ng Talugtug, dito.
Kinilala ng pulisya ang mga dinakip na sina Jayson Flora, 35, may-asawa, negosyante at may-ari ng nasabing bar; Isagani Corsino, 42, may-asawa; Marvin Mabual, 18, binata, Jaime Catolico, 32, may-asawa; Eduardo Bambao, 45, may-asawa; Lori Flora, 51, may-asawa, pawang nakatira sa Barangay Cabiangan ng nasabing bayan; Hazel Remido, 32; Joanalyn Loveres, 35; Jennylyn Kudog, 30, at Clarisse Ann Ilustre, 22, pawang may asawa at residente sa Barangay Alula, Talugtug, NE.
Ayon sa pulisya, bandang alas-10 ng gabi nang sorpresahin nila ang grupo na nagkakantahan at nag-iinuman sa lugar.
Pagdating umano ng pulisya roon, nakita nilang walang suot na face mask at walang social distancing na malinaw umano na paglabag sa health protocols na itinakda ng Inter-Agency Task Force on COVID-19 sa ilalim ng umiiral na Modified General Community Quarantine (MGCQ) sa lalawigan.