TUGUEGARAO CITY, Cagayan , Philippines — Tatlong dalagita na magkakaibigan ang tinangay ng agos at lamunin ng ilog sa Brgy. Alicaocao, Cauayan City, Isabela kamakalawa.
Kinilala ni Lt. Colonel Gerald Gamboa, hepe ng Cauayan City Police, ang mga nasawi na sina Precious Calati, 13-anyos ng Brgy. Labinab at Nerish Domingo, 15, ng Brgy. Baringin Norte, pawang sa nasabing lungsod.
Ayon kay Gamboa, unang natagpuan ng search and rescue team ang bangkay ni Calati kamakalawa ng hapon habang si Domingo ay nakita dakong alas-7:00 ng umaga kahapon.
Pinaghahanap ang isa pang biktima na si Jessa Mae Ballad, 15-anyos ng Brgy. Labinab na pinaniniwalaang nalunod rin.
Ayon sa report, napagtripan ng tatlo na magtampisaw sa tubig sa kalagitnaan ng kanilang picnic nang sabay silang tinangay ng agos dakong alas-3:30 ng hapon., —Victor Martin Joy Cantos