Mga baril at bala nasamsam sa Gubat
LEGAZPI CITY, Albay, Philippines — Walong baril at tambak na mga bala ang nadiskubre ng mga pulis at sundalo habang nagsasagawa ng joint operation sa masukal na lugar ng Brgy. Togawe, Gubat, Sorsogon kamakalawa ng gabi.
Sa ulat, alas-7:00 ng gabi habang nagsasagawa ng intelligence operation ang mga tauhan ng 31st Infantry Batallion ng Philippine Army, 1st Provincial Mobile Force Company at Regional Mobile Force Batallion kasama ang apat na dating rebelde nang madiskubre nila ang mga nakatagong baril sa malapit sa bahay ng isang nagngangalang Discoro Perez.
Nasamsam ang dalawang Uzi Machine Pistol, dalawang kalibre 45 pistola, apat na kalibre 38, tatlong handheld radio, mga magazine at 200-rounds ng bala mula sa naturang mga baril.
Tatlong linggo na ang nakakaraan, 10 piraso ng M16 armalite rifles at 85 kahon ng mga bala na may tatak pa mula sa Sandatahang Lakas ang natagpuan ng mga pulis at militar sa abandonadong bahay sa Sitio Angas, Brgy. Otavi, Bulan ng naturang lalawigan.
- Latest
