Radio station assistan manager nag-amok, arestado

LEGAZPI CITY, Albay, Philippines — Arestado at nahaharap sa kasong alarm and scandal at illegal discharge of firearm ang isang assistant manager ng isang radio station matapos na magwala at walang habas na magpaputok ng baril sa harap ng asawa ng may-ari ng kanyang pinagtatrabahuhang himpilan sa Brgy. Quirangay, Camalig, dito sa lalawigan kamakalawa ng gabi.

Kinilala ang suspek na si Jaime Baria Olarte, 47-anyos, nagsisilbing hepe ng “Anti-smoking Task Force” ng lungsod at residente ng Brgy.13, Marquez St., Legazpi City.

Sa ulat, dakong alas-7:40 ng gabi sa hindi malamang dahilan ay biglang sumugod si Olarte sa harap ng bahay ni Jayroll Baile na may-ari ng kanilang radio station na DZJA Aguila 103.5 News FM.

Habang armado ng hindi malamang kalibre ng baril ay nagwala si Olarte at apat na beses na ipinutok ang dalang baril sa direksyon mismo ng asawa ng may-ari ng radio station na si Cherry Mae Baile, 33-anyos na masuwerte namang hindi tinamaan.

Dala ang cellphone ni Baile, kung saan nairekord lahat nito ang pagwawala at pagpapaputok ng suspek, ay sumugod sa police station at inireklamo ang huli.

Agad naaresto ang suspek pero hindi nakuha ng mga pulis ang ginamit na baril. Gayunman, dahil sa ebidensiyang hawak ng ginang ay sasampahan ng patung-patong na kaso ang suspek.