Cavite police na papasok sa trabaho, todas sa ambush

Bacoor City, Cavite, Philippines — Idineklarang dead-on-arrival ang isang pulis nang ito ay pagbabarilin ng mga hindi pa kilalang mga salarin habang sakay ng kanyang sasakyan papasok sa trabaho, kamakalawa ng gabi sa intersection ng Molino Boulevard, Brgy. Baya­nan ng nasabing bayan.

Ang nasawing pulis ay kinilalang si P/SMS Walter Agoho Mercado, 40, nakatalaga bilang desk officer sa Bacoor Police Station.

Sa nakalap na ulat mula sa tanggapan ni Cavite Provincial Director Police Col. Marlon Santos ng Cavite PPO, alas-9:00 ng gabi ay sakay ang biktima ng kaniyang Mitsubishi Montero (WIZ285) patungo sa Bacoor Police Station upang mag-duty.

Pagdating sa intersection ng nasabing lugar ay tinapatan siya ng isang sasakyan at dito ay pinagbabaril ang biktima ng mga suspek bago tuluyang tumakas.

Ang biktima ay dinala sa St. Dominic Medical Center, subalit hindi na ito umabot pa ng buhay.

Patuloy ang imbes­tigasyon ng pulisya sa motibo ng krimen at pagkakakilanlan ng mga salarin.