MANILA, Philippines – Narekober na ng mga otoridad ang ginamit na getaway vehicles ng mga suspek sa naganap na pag-ambush kay dating Pangasinan Governor Amado Espino Jr.
Ayon kay Police Regional Office-1 (PRO1) Director P/Brig. Gen. Joel Sabio Orduna, narekober nila ang pulang Hyundai Elantra at gray Ford Everest sa ginawa nilang follow-up operation sa Barangay Pasima, San Carlos City Pangasinan.
Natagpuan din ng itinatag na Special Investigation Task Group (SITG) na nagsasagawa ng imbestigasyon sa kaso ang tatlong M16 rifles sa loob ng Hyundai Elantra habang dalawang M14 at M16 sa loob naman ng Ford Everest.
Matatandaan na dakong alas-4:30 noong Miyerkules ng hapon nang tambangan ang convoy ng dating gobernador ng mga armadong lalaki sa Magtaking, San Carlos City ng nasabing lalawigan na ikanasawi ng isang bodyguard at ikinasugat ni Espino at ng tatlo pang ibang kasama sa sasakyan.
Samantala, inihayag ni Police Col. Redrico Mara-nan, hepe ng Pangasinan Police, na bago nangyari ang pananambang ay lumiham si Espino sa kanya noong nakaraang linggo dahil may natatanggap itong mga pagbabanta sa buhay kaya pansamantala siyang nabigyan ng security.