CAVITE , Philippines — Nadakma ng Bacoor City Police at Philippine Drug Enforcement Agency (PDEA) ang dalawang umano’y supplier ng droga ng naarestong bishop kamakailan kabilang ang isang pulis na AWOL sa isinagawang drug bust operation kamakalawa ng gabi sa Brgy. Alima ng nasabing lunsod.
Kinilala ni Police Supt. Vic Cabatingan, hepe ng pulisya sa lungsod ang mga suspek na sina Paulo Balatbat alias Epong, 56 anyos, isang pulis na nag-AWOL sa serbisyo at kasama sa street level target ng pulisya, residente ng Brgy. Alima, Bacoor City at kasama nitong si Fernando Dacoma alias Nanding, nasa 39-anyos, karpintero, residente ng nasabi ring lugar at nasa drug watchlist din ng pulisya.
Ayon kay Cabatingan, alas-8:00 ng gabi nang ikasa nila ang buy-bust operation kasama ang PDEA agents laban kay Balatbat at sa kasama nito sa Pay St., Brgy. Alima. Habang isinasagawa ang transaksyon, agad na inaresto ang dalawa.
Sa interogasyon, dito napag-alaman na si Balatbat ay isang pulis na dating nakatalaga sa Western Police District. Napag-alaman din na ang mga suspek ang nagsisilbing supplier ng shabu ng nadakip na si Bishop Richard Alcantara ng Sacred Order St. Michael (SOSM) kamakailan sa isang buy-bust operation.
Narekober sa dalawang suspek ang 13 plastic sachet ng shabu na nasa mahigit 4-gramo at nagkakahalaga ng ?30,000.