RIZAL , Philippines — Bulagta ang isang pulis matapos siyang tambangan at pagbabarilin ng dalawang hindi pa nakikilalang suspek habang papasok sa kanyang trabaho sa Antipolo City kahapon.
Kinilala ni Rizal Police Provincial Office P/Senior Supt. Lou Frias Evangelista ang biktima na si PO2 Jose Jello Changcoco, 48, nakatalaga sa Angono Police Station, at residente ng 802 Pearlane Street, Cristimar Village, Barangay San Roque, Antipolo City.
Sa imbestigasyon, dakong alas-6:20 ng umaga, papasok na sana sa trabaho ang biktima sakay ng kanyang service vehicle, nang pagsapit sa Gate 2 ng Cristamar Village, Circumferential Road sa Brgy. San Roque, ay bigla na lang siyang salubungin at pagbabarilin ng dalawang ‘di kilalang suspek. Nagawa pa ng biktima na imaneho pabalik ang kanyang sasakyan, ngunit bago tuluyang nakalayo ay nawalan na siya ng ulirat dahil sa rami ng tama ng bala sa iba’t ibang bahagi ng katawan.
Mabilis na tumakas ang mga suspek sakay ng isang tricycle patungong Sitio Ligtasan Road.