LEGAZPI CITY, Albay, Philippines — Bulagta ang isang 47-anyos na aktibong kasapi ng Citizen’s Armed Forces Geographical Unit (Cafgu) na isa ring chief tanod matapos pagbabarilin ng tatlong armado habang naglalakad sa Purok-7, Brgy. Pinamaniquian sa Ligao City, lalawigang ito kamakalawa ng gabi.
Tinamaan ng mga bala sa ibat-ibang bahagi ng katawan ang biktimang si Gregorio Atanante Jr, ng nasabing barangay. Ayon sa anak ng biktima na si Ramon,19, dakong alas-7:24 ng gabi habang naglalakad ang kanyang tatay upang bumili ng sigarilyo nang biglang sumulpot ang isang hindi nakilalang lalaki at biglang pinagbabaril ang ama.
Isa pang suspek ang lumitaw sa madilim na bahagi ng kalye at dalawang beses na pinutukan ang biktima habang ang isa pa na nakatago sa sagingan ang lumabas at tumulong na rin sa pamamaril.
Kahit sugatan, nagawang makatakbo ng biktima pero hinabol siya ng mga suspek at muling pinagbabaril hanggang sa tuluyang tumimbuwang. Sinubukang isugod ng mga kaanak ang biktima sa Josefina Belmonte Duran Memorial District Hospital pero idineklarang patay.