42 mag-aaral nalason sa kendi
BAYOMBONG, Nueva Vizcaya , Philippines — Nasa 42 mag-aaral ang isinugod sa pagamutan matapos sumakit ang kanilang tiyan sa kinain umanong kendi sa Natubleng, Buguias, Benguet.
Ayon sa Buguias Police, umabot na sa 42 ang mga mag-aaral sa elementarya at sekondarya ang isinugod sa Atok District Hospital matapos muling ibalik ang 11 mag-aaral sa pagamutan kahapon ng umaga bukod pa sa anim na unang na-confine dahil sa pananakit ng tiyan.
Napag-alaman na may kakaiba umanong amoy ang kendi na kinain ng mga mag-aaral mula sa mag-asawang Koreano na matagal umanong namimigay ng pagkain sa mga bata.
Pumirma naman umano ang mag-asawang misyonero na Koreano na makikipagtulungan sa imbestigasyon.
Posible umanong kasuhan ang manufacturer o pagawaan ng kendi kabilang na rin ang grocery kung saan ito binili ng mag-asawang Koreano.
Patuloy ang isinasagawang imbestigasyon ng mga otoridad at sa pagsusuri sa sample ng kendi upang matukoy kung sira na ito at nakalalason.
- Latest
