NORTH COTABATO , Philippines — Dalawang lalaki kabilang ang isang bagong laya mula sa Provincial Jail ang kapwa nasawi makaraang pagbabarilin ng riding-in-tandem suspects sa harap ng Fairy Queen KTV Bar sa bisinidad ng Manapao St., Brgy. Poblacion, Kabacan, ng lalawigan noong Linggo ng umaga. Kinilala ni P/CI Ronnie Cordero, hepe ng Kabacan PNP ang mga nasawi na sina Kipua Mukalam, 18 anyos, magsasaka na residente ng Sitio Lugit, barangay Lower Paatan ng nasabing bayan at si Randy Kadil Samama, residente ng Carmen, North Cotabato. Si Samama ay bagong laya lamang mula sa North Cotabato Provincial Jail dahil sa kasong pagnanakaw. Ayon sa report, dakong alas-8:20 ng umaga habang nakatayo sa harap ng KTV bar ang dalawang biktima na parang may hinihintay nang lapitan ng mga suspek at walang sabi-sabing pinagbabaril sa ulo. Personal na alitan ang isa sa mga anggulong sinusundan ng pulisya sa krimen.