Rider na parak salpok sa trak, dedo

Legazpi City, Albay, Philippines — Hindi na umabot pa nang buhay sa pagamutan ang isang pulis matapos na sumalpok ang minamaneho niyang motorsiklo sa trak na nasiraan sa gitna ng kalsada sa kahabaan ng Gov. JT Fuentebella National Highway sa bahagi ng Brgy. Ayugan sa bayan ng Ocampo, Cam Sur noong Biyernes ng madaling araw. 

Dead-on-arrival sa Ocampo District Hospital ang biktimang kinilalang si PO1 Jhun-Jhun Payno Pastorco, 29-anyos, residente ng Borja St., sa bayan ng Goa, at nakatalaga sa Police Mobile Force Company sa bayan ng Tigaon. 

Sa police report na nakarating sa Camp Gen. Simeon Ola, dakong alas-4:00 ng madaling araw, habang binabaybay ng biktima ang naturang highway patungong Naga City nang sumalpok ito sa nasiraang Pensumil Truck sa gitna mismo ng kalsada na minamaneho ni Roberto Hermogenes, 49-anyos, residente ng Brgy. Katalotoan sa bayan ng Sangay.

Ayon sa mga nakasaksi, posibleng hindi napansin ng biktima ang nasiraang trak sa gitna mismo ng kalsada dahil sa walang early warning device. Nakatakdang sampahan ng patung-patong na kaso ang sumukong suspek na driver ng trak.