TUGUEGARAO CITY, Cagayan , Philippines — Nasa malubhang kalagayan ngayon sa pagamutan ang isang 36-anyos na negosyante matapos siyang ratratin ng riding-in-tandem habang sakay ng kanyang traysikel sa Barangay Jordan, Sinait, Ilocos Sur noong Sabado. Sa report na ipinalabas ni Chief Insp. Winnie De Vera, tagapagsalita ng Ilocos Sur PNP, pauwi na si Maricel Ilar dala ang mga paninda niyang RTW nang ratratin siya ng mga hindi natukoy na suspek dakong alas-11:40 ng gabi.
Unang isinugod ng mga sumaklolo si Ilar sa isang pribadong hospital sa Sinait subalit kalaunan ay inilipat sa Mariano Marcos Memorial Hospital and Medical Center sa Batac City, Ilocos Norte dahil sa maselan niyang kalagayan. Nabatid na wala sa drugs watchlist ng pulisya ang biktima habang inaalam pa rin ng mga imbestigador ang motibo sa pamamaril.