MANILA, Philippines — Bumulagta noon din ang isang lalaking sinasabing notoryus na tulak ng marijuana matapos na kumasa ito sa pulisya sa isinagawang buy-bust operation sa isang bahagi ng Brgy. Masuso sabayan ng Pandi, Bulacan, Biyernes ng gabi.
Kasalukuyan pang inaalam ng pulisya ang pagkakakilanlan ng nasawing suspek na may alyas lamang sa “Nognog”, nasa hustong gulang at nakumpirmang patuloy na nagbebenta ng droga sa naturang lugar.
Sa ulat ni P/CInsp. Manuel De Vera ng Pandi PNP, dakong alas 9:00 ng gabi ay nakipagkita ang isang poseur buyer na pulis sa suspek upang bumili ng droga.
Habang nag-aabutan ang magkabilang panig ay nakahalata ang supek na pulis ang kanyang katransaksyon dahilan upang bumunot ito ng baril subalit naunahan siyang putukan ng pulisya na nagresulta sa kanyang kamatayan.
Narekober sa lugar ng insidente ang 4 na pakete ng marijuana, isang 9mm na baril, mga bala at P300 marked money na ginamit sa operasyon.