BULACAN, Philippines — Kalaboso ang dalawa sa apat na armadong kalalakihan matapos nilang holdapin ang kilalang establisimyento sa Brgy. Bagong Barrio, bayan ng Pandi sa lalawigan, Biyernes ng umaga.
Kinilala ang na-biktima na si Precy Racho, 55, stay-in cashier ng United Asia Integrated Farm at residente ng Brgy. Bagong Barrio sa naturang lugar.
Ang mga naarestong suspek ay sina Joshua Pitogol at Angelo Rosada, kapwa ng Brgy.Virgen Delos Flores, Baliwag.
Sa ulat ni P/CInsp. Manuel De Vera ng Pandi PNP dakong alas-10:30 ng umaga, nagpunta ang apat na suspek sa puwesto ng biktima lulan ng dalawang motorsiklo at nagkunwaring interesado sa pagbili ng mga binebentang hayop na agad namang pinayagang pumasok ng nakatalagang sekyu sa lugar.
Pagpasok ng mga suspek sa opisina ng biktima, dito na siya agad tinutukan ng baril saka tinalian ang mga kamay at paa nito. Mabilis nilang kinuha ang hindi pa mabatid na halaga ng pera na nasa loob ng drawer at saka tumakas.
Sa follow-up operation ng pulisya, naaresto ang dalawa sa bayan ng Baliwag at narekober ang ginamit nilang sasakyang motorsiklo. Tinutugis pa ang dalawa nilang kasamahan habang sinisilip ng pulisya ang anggulong “inside job” sa insidente.