COTABATO CITY, Maguindanao, Philippines – Kalaboso ngayon ang 51-anyos na cancer at diabetic patient matapos itong makumpiskahan ng P.5 milyong halaga ng shabu at mga armas sa inilatag na drug bust operation sa Purok Tagumpay, Barangay General Paulino Santos sa Koronadal City, North Cotabato kahapon ng umaga.
Kinilala ni PDEA-12 Information Officer Kath Abad ang suspek na si Franklin “Kano” Biñas ng nasabing barangay.
Nasamsam sa suspek ang mga 7-jumbo pack heat sealed plastic sachets na shabu, isang M26 at isang M22 hand grenade, isang cal.45 pistol, isang cal .38 revolver, mga cell phone, pera at drug paraphernalia.
Kahit may sakit na cancer at diabetes ang suspek ay lakas-loob pa rin itong nagbebenta ng droga sa nasabing lungsod.
Napag-alaman din na dati nang nasakote ang suspek ng Koronadal City PNP subalit nakalabas matapos makapagpiyansa.
Nakakulong na sa kampo ng PDEA-12 ang suspek habang inihahanda ang kaukulang kaso.