LEGAZPI CITY, Albay, Philippines – Kapwa bumulagta ang 58-anyos na retiradong sundalo at isang guro makaraang magduwelo gamit ang baril at patalim sa Purok 7, Barangay Inamnan Pequeño sa bayan ng Guinobatan, Albay noong Martes ng gabi.
Kinilala ang dalawa na sina Apollo Pallan, dating sundalo ng Philippine Army; at Reynato Nares, 38, guro ng Quitago Elementary School na kapwa nakatira sa nabanggit na barangay.
Nabatid na inabangan ni Nares na naglalakad pauwi si Pallan saka pinagsasaksak sa madilim na bahagi ng kalsada.
Sunud-sunod na putok ng baril ang umalingawngaw kung saan nakita ng mga residente na nakabulagta at duguan si Nares habang si Pallan naman ay namataang nakarating pa at bumulagta sa harap ng gate ng kanilang bahay.
Sa imbestigasyon ng Guinobatan PNP, nag-ugat ang alitan ng dalawa dahil sa palagiang kinukwestyon ni Pallan ang guro dahil sa mga kahina-hinalang bumibisita gabi-gabi sa bahay nito.
Si Nares umano ay dati nang tinokhang ng mga pulis pero tumangging sumuko.
Narekober sa crime scene ang mahabang kutsilyo, bakal na tubo pero walang narekober na baril o basyo ng bala kaya isinailalim sa paraffin test ang katawan ng ex-Army.