CAVITE, Philippines – Bulagta ang notoryus na holdaper na sinasabing nasa drug watchlist matapos itong makipagbarilan sa mga pulis kahapon ng umaga sa Barangay San Agustin 1, Dasmariñas City, Cavite. Kinilala ng pulisya ang napatay na si Rodante “Bontong” Timbang ng nasabing barangay. Base sa ulat, hinoldap ng suspek ang biktimang si Joel Dela Cruz kung saan ito nagreklamo sa himpilan ng pulisya. Kaagad na isinagawa ang follow-up operation hanggang sa makorner ang suspek subalit nanlaban ito at napatay. Nabatid na sangkot ang suspek sa serye ng holdapan sa nasabing lungsod. Narekober sa suspek ang cal. 38 revolver, apat na basyo ng bala, isang plastic sachet ng shabu, improvised water pipe, amulet at tari ng manok.