BATAAN, Philippines – Umabot sa P77 libong halaga ng ari-arian ang natangay makaraang looban ng Akyat-bahay Gang ang dalawang Tsino sa RM Square Transient House sa MAAP Road Barangay Alas-Asin sa bayan ng Mariveles kamakalawa ng madaling araw.
Kinilala ng pulisya ang mga biktima na sina Yang Zhong Xiu, 27, may-asawa; at Xiao Huaji, 27, kapwa nagtatrabaho sa Shanghai Electrical Power Construction Co. Philippine Corp. na nasa sa loob ng GN Power Plant at nakatira sa nasabing barangay.
Sa imbestigasyon ni PO3 Loyd Opena, bandang alas-9 ng umaga nang madiskubre ang pagnanakaw matapos magising ang dalawa sa kanilang inuupahang bahay kung saan nalimas ang isang laptop na kulay itim at mobile phone na nasa ibabaw ng lamesa sa sala.
Nadiskubre rin na winasak ang bintana sa sala na sinasabing pinasukan ng mga magnanakaw kung saan umaabot sa P77,000 ari-arian ang naglaho habang patuloy pa rin ang imbestigasyon.