CAVITE, Philippines – Pinaniniwalaang na-overdose sa shabu ang 48-anyos na mister kaya ito namatay sa loob ng kanyang bahay sa Barangay Gregoria De Jesus sa bayan ng General Mariano, Cavite kahapon ng umaga. Bandang alas-9:30 ng umaga nang madiskubre ng kapitbahay ang katawan ni Ramonito Sucaldito ng Lower Moonlight, Phase 1 sa nasabing barangay. Huling namataang buhay ang biktima na nakatulala sa barandilya ng kanyang bahay kung saan sinasabing malimit gumamit ng droga. Narekober ng pulisya sa loob ng kuwarto ng biktima ang isang plastic sachet na may shabu, improvised tooter, aluminum foil, at heater pan. May teorya ang pulisya na nasobrahan sa shabu ang biktima bukod sa mga karamdaman nitong taglay.