MANILA, Philippines – Tatlo-katao kabilang ang bagitong pulis ang inaresto ng mga awtoridad sa isinagawang buy-bust operation na nagresulta rin sa pagkakasamsam ng P.5 milyong halaga ng shabu sa Sitio Pailob sa Barangay Sambang 2 sa Cebu City, Cebu kamakalawa ng gabi. Pormal na kinasuhan ang mga suspek na sina PO1 Gem Querubin, 33, nakatalaga sa Station 11 ng Cebu City Police; Sharon Abella, 32; at si Chas Elnond Chavit, 23. Base sa ulat, nakatanggap ng impormasyon ang PRO 7 at Philippine Drug Enforcement Agency (PDEA) 7 kaugnay sa bentahan ng droga ng mga suspek kaya isinagawa ang buy-bust operation na nagresulta sa pagkakadakip kay PO1 Querubin at dalawa pang kasamahan nito. Nasamsam ang dalawang malalaking balot ng shabu, walong plastic sachet ng droga (50.32 gramo) na may street value na P 593,776 at ang P2,500 cash money na hinihinalang mula sa droga.