CABANATUAN CITY, Nueva Ecija, Philippines – Napatay ang 32-anyos na traysikel driver matapos itong pagpapaluin ng kahoy ay ginulpi at napatay ng kapwa drayber na kapitbahay sa Barangay General Luna sa Cabanatuan City, Nueva Ecija, noong Biyernes ng gabi. Namatay habang ginagamot sa Dr. Paulino J. Garcia Hospital ang biktimang si Jesus dela Virgen, 32, tricycle driver, ng nasabing barangay habang pinaghahanap ng pulisya ang suspek na si Alvino “Vino” Gamboa, 23. Nabatid nakaupo sa labas ng bahay ang biktima nang lapitan at pagpapaluin sa ulo hanggang sa mapahiga ito sa kalsada. Gayunman, binugbog pa ng suspek ang biktima saka tumakas. Pinaniniwalaang agawan sa pasahero sa traysikel ang isa sa motibo ng suspek para isagawa ang krimen.