Estudyante binuntis ng kidnaper

NORTH COTABATO, Philippines - Arestado ang sinasabing kilabot na kidnaper na miyembro ng Alonto Pentagon Group na bumuntis ng kanyang kinidnap na estudyante matapos itong maaresto ng mga awtoridad sa Purok Masagan, Barangay Katikusa bayan ng Pres. Quirino sa Sultan Kudarat kahapon ng umaga. Pormal na kakasuhan ni P/Senior Insp. Tirso Pascual ng Sultan Kudarat PNP ang suspek na si Jimmy Ta­limbo,  gumagamit ng alyas Commander Tomahawk, ng Sitio Pitupon, Barangay Poblacion sa bayan ng General Salipada K. Pendatun, Maguindanao. Si Talimbo ay inaresto sa bisa ng warrant of arrest na inisyu ni Judge Francis Palmones noong May 18, 2006. Napag-alaman na isang estudyante umano ng University of Southern Mindanao sa bayan ng Kabacan, North Cotabato ang kinidnap ng suspek noong 2001 at kanya pa umano itong binuntis.