Mag-utol grinipuhan ng senglot na ama

TUGUEGARAO CITY, Cagayan, Philippines – Kasalukuyang nakikipaglaban kay kamatayan and mag-utol na lalaki matapos saksakin ng sariling ama na pinaniniwalaang naburyon kamakalawa ng gabi sa Barangay Sto. Domingo, bayan ng Piat, Cagayan. ?

Naisugod sa Nuestra Señora De Piat District Hospital ang mag-utol na sina Reynulfo Bitus, 23; at Aquilino Bitus, 17 habang pinaghahanap naman ang suspek na si Domingo Bitus, 50, mga nakatira sa nasabing barangay.

Ayon kay PO3 Ariel Simon, nakipag-inuman ang suspek sa dalawang anak sa kanilang bahay bago tinabihan ang misis na noon ay nakahilata sa sahig habang nanonood ng telebisyon.

Inumpisahan ng suspek na senglot na kulitin sa pakikipag-sex ang kanyang misis hanggang mauwi sa mainitang pagtatalo kung saan tinangka ng anak na si Aquilino na awatin ang mga magulang.

Subalit sinaksak ng suspek ang kanyang anak kung saan nakisawsaw na rin ang nagising na panganay na si Reynulfo.?

Matapos ang kaguluhan sa bahay ng pamilya Bitus ay lumabas na duguan ang mag-utol dahil sa mga tinamong saksak sa katawan kung saan mabilis na isinugod sa nasabing ospital bago inilipat sa Cagayan Valley Medical Center kung saan sila nakikipambuno kay Kamatayan. ?

Naglahong parang bula ang suspek habang patuloy naman ang imbestigasyon.