MANILA, Philippines – Dalawang hinihinalang drug pusher ang napaslang matapos na umano’y kumasa sa arresting team ng pulisya sa Brgy. Sapangbato, Angeles City, Pampanga kamakalawa ng gabi.
Kinilala ni Chief Supt. Rudy Lacadin, director ng Police Regional Office (PRO) 3, ang mga napatay na sina Louie Michael Ocampo alyas “Abuso”, 35-anyos at Allan Aguilar, 42, habang nadakip ang isa pa na si Alvin Santos, 32, pawang nakatira sa nasabing barangay.
Bandang alas-8:30 ng gabi, ayon kay Lacadin nang magtungo sa lugar ang mga elemento ng Police Station 5 sa pamumuno ni Sr. Inspecttor Ando Doroja upang isilbi ang warrant of arrest laban kay Ocampo subalit imbes na sumuko ay pinaputukan umano ang mga operatiba sanhi ng sagupaan.
Si Ocampo ay wanted sa kasong paglabag sa Republic Act 9165 o ang Anti Illegal Drugs Act at walang inirekomendang piyansa ang korte para sa pansamantala nitong kalayaan.
Isinagawa ang operasyon sa bisa ng warrant of arrest na inisyu ni Judge Omar Viola ng Regional Trial Court (RTC) ng Angeles City laban kay Ocampo.