Drug pusher tumba sa shootout

CAVITE, Philippines – Napaslang ang 42-anyos na sinasabing drug pusher matapos itong makipagbarilan sa mga operatiba ng pulisya sa inilatag na buy-bust operation sa bahagi ng Barangay Molino 3 sa Bacoor City, Cavite kamakalawa ng gabi. Kinilala ang napatay na si Ramir “Tisoy” Mananthan ng nabanggit na barangay. Sa ulat ng pulisya na isinumite sa Camp Pantaleon Garcia sa Imus City, inilatag ang buy-bust operation laban kay Tisoy subalit nakatunog ito at nakipagbarilan. Gayon pa man, gumanti ng putok ag grupo ng PNP kaya bumulagta ang drug pusher na si Tisoy. Sa tala ang pulisya, si Tisoy ay itinuturong nasa likod ng serye ng nakawan sa nasabing barangay at pangunahing suspek sa pagpatay sa isang negosyante sa Camella Spring Ville noong Nobyembre 14, 2015. Narekober ang isang cal. 38 revolver, mga bala at ang P500 marked money na ginamit sa buy-bust operation.