OLONGAPO CITY, Philippines – Rehas na bakal ang binagsakan ng apat-katao makaraang makumpiskahan ng baril at shabu sa Barangay Barretto, Olongapo City kamakalawa ng umaga. Kinilala ni P/Senior Insp. Rodel Basos Paragas, commander ng police station 6, kinilala ang mga suspek na sina Elmerson Magtanong, 34; Jason Bueta, 21, mga residente sa Barangay Gordon Heights; Joan March Macahibag, at si Noel Wallace, mga nakatira sa Barangay Barreto. Dakong alas-7:30 ng umaga nang sitahin ng pulisya ang mga suspek na magkakausap sa gilid ng nakaparadang motorsiklo. Namataan may sukbit na baril sa baywang si Magtanong kaya ito pinigil maging ang tatlo pang suspek na nakumpiskahan naman ng shabu. Pinaniniwalaang may planong mangholdap ang mga suspek nang sitahin ng mga operatiba ng pulisya.