MANILA, Philippines – Patay ang isang mag-asawa matapos pagbabarilin ng kapatid na lalaki ng isa sa mga biktima matapos ang mainitang pagtatalo sa Brgy. Caosucan Sur, Asingan, Pangasinan nitong Biyernes ng gabi.
Sa ulat ng Pangasinan Police, kapwa dead-on-arrival sa Asingan Community Hospital ang mga biktimang sina Crisanto Obillo, 49, at misis nitong si Joane Obillo, nasa hustong gulang matapos magtamo ng mga tama ng bala ng cal. 45 pistol sa kanilang mga katawan.
Ang suspek na tumakas ay si Mario Obillo, 43 , kapatid ng napatay na mister.
Base sa imbestigasyon, naitala ang krimen sa tahanan ng mag-asawa bandang alas-6:00 ng gabi matapos na magtalo ang magkapatid.
Agad na bumunot ng baril ang suspek at pinagbabaril nang sunud-sunod ang kaniyang kuya at hipag saka mabilis na tumakas.
Sa inisyal na imbestigasyon na alitan sa pamilya ang motibo ng krimen.