MANILA, Philippines – Isang overseas Filipino worker (OFW) na kakauwi lamang sa bansa para mag-Pasko sa piling ng kanyang pamilya ang nasawi makaraang tambangan at pagbabarilin ng motorcycle riding in tandem sa Brgy. Road, Brgy. Balite Sur, San Carlos City, Pangasinan kamakalawa ng gabi.
Kinilala ang biktima na si Romeo Paningbatan, 57 at residente sa nasabing lugar na nagtamo ng maraming tama ng bala ng shotgun sa ulo.
Sa ulat ng San Carlos City Police, dakong alas-11 ng gabi habang lulan ang biktima ng kanyang service tricycle na Honda TMX 155 sa nasabing lugar upang makipagkita sa isang Tirso delos Reyes, nasa hustong gulang na umano’y may utang na P5,000 sa kanyang misis nang tambangan ng mga armadong lalaki lulan ng motorsiklo.
Nabatid na ang misis ng biktima ay may negosyong 5-6 o pagpapautang ng pera sa kanilang lugar.
Ayon sa mga saksi, binuntutan umano ng mga suspek ang biktima at saka pinagbabaril pagsapit sa madilim na bahagi ng lugar at saka sila mabilis na tumakas.
Pinaniniwalaan na may kinalaman sa negosyong patubuang pautang na pera ng misis ng biktima ang motibo ng pamamaslang.