5 magkakamag-anak minasaker sa bahay
NORTH COTABATO, Philippines – Magkakasunod na minasaker ang limang magkakamag-anak kabilang ang tatlong bata matapos pagbabarilin ng mga di-kilalang kalalakihan sa loob ng kanilang bahay sa Purok 1, Barangay Ugalingan sa bayan ng Carmen, North Cotabato noong Lunes ng gabi.
Kinilala ang mga napatay na sina Ebrahim Agal, 50; Sara Agal, 9; Pama Agal, 10; Mustafa Agal, 12; at Mohamed Agal, 18.
Naisugod naman sa Kidapawan Specialist Hospital at Cotabato Provincial Hospital sina Jerry Liposil, 42; Nasrudin Agal, 9; at si Maki Agal.
Nabatid na ang mga batang biktima ay mag-aaral ng Lumayong High School.
Nakaligtas naman sa tiyak na kamatayan sina Mojani Agal, 3; lola na si Lipusin Agal, 63; at si Anida Agal.
Sa impormasyon mula kay P/Chief Insp. Bernard Tayong, spokesman ng North Cotabato PNP, walang habas na pinagbabaril ang mga biktimang natutulog sa loob ng bahay na malapit sa ilog.
Sa pahayag ni Chairman Bong Bacana ng Barangay Kayaga sa bayan ng Kabacan, ang mga biktima ay residente ng Sitio Lumayong nang harasin ng mga armadong kalalakihan kaya napilitang lumipat sa nasabing barangay.
Pinaniniwalaang may malalim na alitan ang mga biktima at grupo ng kalalakihan kaya isinagawa ang pamamaslang.
- Latest
