MANILA, Philippines – Itinanggi kahapon ng pamunuan ng Globe Telecom na kanilang kawani ang isang Joel Garcia na suspek sa panghahalay sa 16-anyos na dalagita na ginawang sex-slave ng dalawang buwan.
Sa opisyal na statement ng Globe, sinabi ni Yoly Crisanto, Globe Senior Vice President for Corporate Communications na hindi empleyado ng kumpanya si Garcia.
“Base on the company’s active employee database, no “Joel Garcia” is currently employed by the company,” paglilinaw ni Crisanto.
Si Garcia ang itinuturong suspek na ngayon ay pinaghahanap ng pulisya sa pang-aabuso sa 16-anyos na dalagita na nailigtas ng mga operatiba ng PNP-Criminal Investigation and Detection Group sa Barangay Cabuco, Trece Martirez City, Cavite noong Oktubre 27 matapos na humingi ng tulong ang ina ng dalagita sa mga awtoridad.
Kinaibigan muna umano ng suspek ang biktima at saka nito binihag noong Agosto 2015. Pinangakuan umano nito ang dalagita na kanyang ipapasok sa trabaho subalit ikinulong sa kanyang bahay at ginawang sex slave.