BULACAN, Philippines – Patay ang isang negosyante ng mga bote at bakal nang likidahin ng nag-iisang gunman habang nakaupo sa pag-aaring establisimyento sa Brgy. Bunducan, Bocaue, Bulacan kahapon.
Nagtamo ng tama ng bala sa iba’t ibang bahagi ng katawan at paa ang biktimang si Edmund “Pito” Roxas, 29, ng Sitio Ipo, Brgy. Bunducan sa naturang bayan.
Kaswal namang naglakad papalayo sa pinangyarihan ng krimen bitbit ang armas na ginamit ng suspek na inilalarawan lamang sa nakasuot ng itim na t-shirt at comouflage na pantalon.
Sa ulat ni PO2 Rajic Catiis, dakong alas-12:30 ng hapon habang nakaupo ang biktima sa harapang bahagi ng pag-aaring junkshop sa Sitio Ipo nang biglang lumapit ang isang lalaki saka tinanong kung siya si alyas Pito na sinagot naman ng biktima saka muling nagsalita ang suspek na “Ikaw pala ang bumugbog kay Marlon De Leon.” Dito na binunot ng suspek ang dalang baril na .45 kalibre at sunud-sunod na pinaputukan ang biktima.
Narekober ng rumespondeng pulisya ang anim na basyo ng bala habang pinaniniwalaang paghihiganti ang motibo ng krimen.