MANILA, Philippines – Siyam na manggagawa na dinukot ng mga bandidong Abu Sayyaf noong Lunes ang nailigtas ng tropa ng militar sa Barangay Kaumpamatsaken, bayan ng Sumisip, Basilan, ayon sa opisyal kahapon.
Kabilang sa mga nasagip na biktima ay sina Nasser Jallaha, Merhusin Ubbay, Mustapha Gapul, Abukaisir Nasilin, Jaya Abdulla, Johan Sarao, Nadzhar Garbon, Alsibar Jauhari, at si Margani Alpha na pawang trabahador ng Abubakar Construction.
Base sa record, ang mga biktima ay gumagawa ng water tank nang lapitan at dukutin ng grupo ni Abu Sayyaf Sub –Leader Juhaibel Alamsirul alyas Kumander Abu Kiks sa Brgy. Upper Benembengan. Subalit nakatakas ang dalawa sa mga bihag kaya naipaabot ang insidente sa mga awtoridad.
Na-pressure naman ang mga kidnaper kaya napilitang abandonahin ang mga bihag matapos ilatag ang operasyon ng Marine Battallion Landing Team11 at Army’s 64th Infantry Battalion ang kagubatan ng nabanggit na barangay. Bandang alas-4:40 ng hapon nang masagip ng mga sundalo ang mga bihag sa nabanggit na barangay.