NORTH COTABATO, Philippines – Brutal na kamatayan ang sinapit ng 35-anyos na misis na sinasabing may itinatagong lover matapos itong pagsasaksakin ng kanyang mister na nagpakamatay din sa kanilang bahay sa Barangay Rangaban Dos, bayan ng Midsayap sa North Cotabato kamakalawa ng gabi.
Sa ulat na nakarating kay P/Senior Inspector Henry Narciso, deputy chief ng Midsayap PNP, matutulog na sana ang mag-asawang Ramon Bajador, 38; at Mylin Bajador nang mabasa ng mister ang text message sa cellphone ng misis mula sa ka-textmate na nakasaad - “Saan ka na ngayon na miss kita kaylan tayo magkikita.”
Dito na sumiklab ang matinding away ng mag-asawa sa loob ng kanilang kuwarto kung saan sa galit ng mister na may karelasyong ibang lalaki ang kanyang asawa ay kumuha ito ng patalim at isinagawa ang pananaksak.
Nang makitang naliligo sa sariling dugo ang misis ay nagsaksak din ng tatlong beses sa kanyang dibdib ang mister.
Naisugod pa sa Ramon Pisante Memorial Hospital sa bayan ng Midsayap ang misis subalit idineklarang patay dahil sa tinamong siyam na saksak.