QUEZON, Philippines – Nagmistulang kinatay na hayop ang katawan ng 63-anyos na magsasaka makaraang pagtatagain hanggang mapatay ng kanyang kaibigang kapitbahay nang mapagkamalan itong magnanakaw kamakalawa ng madaling araw sa Sitio Parang, Barangay Rizal sa bayan ng San Narciso, Quezon. Ang biktima na nagtamo ng mga taga sa braso, mukha at halos humiwalay na ang ulo sa leeg ay kinilalang si Bienvenido Carmen habang sumuko naman sa himpilan ng pulisya ang suspek na si Narciso Dondriano, 62. Sa imbestigasyon ng pulisya, dakong alas-12:30 ng madaling araw ay natutulog sa kubo ang suspek nang magising ito sa mga kaluskos sa labas ng bahay. Maya-maya ay may nagbukas ng pintuan ng kanyang kubo kung kaya kumuha ito ng gulok at pagpasok ng biktima ay agad nitong pinagtataga. Gayon na lamang ang pagkagitla ng suspek nang mapagtanto na ang kanyang napatay ay ang kaibigang matalik.