ZAMBALES, Philippines –Tatlo-katao ang napatay makaraang pagbabarilin ng tatlong di-kilalang lalaki na pinaniniwalaang miyembro ng drug syndicate sa Brgy. Balaybay, bayan ng Castillejos, Zambales kamakalawa ng umaga. Kinilala ang mga napatay na sina Mac Arthur Douglas Lesaca ng Brgy. Tampo sa bayan ng Botolan, Zambales; Ruby Corazon Fernan, 39, ng Balaybay Resettlement, bayan ng Castillejos; at si Rodelio Mana ng Barangay Barretto, Olongapo City. Base sa police report, naganap ang pamamaril sa bisinidad ng Purok 12 sa Balaybay resettlement area sa Castillejos kung saan tumakas ang gunmen sakay ng dalawang motorsiklo. Narekober sa crime scene ang siyam na plastic sachet na pinaniniwalaang may kaugnayan sa bentahan sa bawal na droga ang naganap na krimen.