Mangingisdang problemado, nag-suicide

QUEZON, Philippines – Winakasan ng 46-anyos na mangingisda ang kanyang buhay sa pamamagitan ng pag-inom ng lason makaraang hindi na matagalan ang problema sa kanilang pamilya sa Barangay Bacong Ilaya, bayan ng General Luna, Quezon kamakalawa ng umaga. Base sa ulat ng pulisya, dakong alas-7 ng umaga ay humingi ng inuming tubig ang biktimang si Orlando Cabaldo sa kanyang 13-anyos na anak na babae. Gayon pa man, ilang minuto ang nakalipas ay namataan ang biktima na bumubula ang bibig kaya isinugod sa ospital. Lumilitaw na bago maganap ang insidente, ilang araw na umanong nakitang malungkot ang biktima dahil sa hindi maresolbang problemang pampamilya at nagtangka na rin umano itong magpatiwakal subalit napigilan lamang. Hinihinala ng pulisya na tabletang nakalalason ang inihalo ng biktima sa kanyang hininging tubig-inumin upang hindi mapigilan ang muli niyang pagpapatiwakal.