CAVITE, Philippines – Pinabulagta ang 43-anyos na car dealer matapos itong pagbabarilin ng di-kilalang lalaki sa loob ng kanyang kotse sa Purok 5, Barangay Langkaan 1, Dasmariñas City, Cavite kamakalawa ng gabi. Napuruhan sa ulo ang biktima na si Rodrigo Lacanila ng Brgy. Lucsuhin sa bayan ng Silang Cavite. Ayon kay P03 Paulo Figueroa, nakaupo sa driver’s seat ng kotseng may plakang TKD 657 ang biktima nang lapitan at ratratin. Pinaniniwalaang may kaugnayan sa negosyo ng biktima ang naganap na pamamaslang habang patuloy naman ang imbestigasyon.