Amok: 1 dedo, 3 pa grabe
MANILA, Philippines – Isa katao ang nasawi habang tatlo pa ang nasugatan kabilang ang nag-amok na mister na nanaga ng kaniyang mga kapitbahay sa naganap na karahasan sa Brgy. Tulungatung, Zamboanga City kamakalawa.
Kinilala ang nasawing biktima na si Benjamin Castillo, idineklarang dead-on-arrival sa Zamboanga City Medical Center.
Isinugod naman sa pagamutan para malapatan ng lunas ang mga sugatang biktima na sina Jimmy Rendon, 53-anyos, Martilina Castillo, 64-anyos at ang nag-amok na suspek na si Leonidish Bucoy, 32 taong gulang.
Sa ulat ng Zamboanga City Police, naganap ang insidente bandang alas-6 ng umaga matapos na mag-amok ang desperadong suspek na naghamon ng away, pinasok ang tahanan ng kaniyang mga kapitbahay saka nanaga gamit ang isang matalim na karit.
Napilitan namang lumaban si Rendon na tinaga rin ang suspek na nagtamo ng sugat sa kanang mukha, tiyan at kanang balikat. Sa imbestigasyon ng pulisya, lumilitaw na desperado ang suspek dahilan sa problema sa pamilya na nagbunsod sa pagaamok nito.
- Latest
