1 utas, 36 sugatan sa explosion

MANILA, Philippines - Isa katao ang nasawi habang 36 pa ang nasugatan makaraang yanigin ng malakas na pagsabog ang harapan ng isang bus terminal sa Brgy. Guiwan, Zamboanga City nitong Biyernes ng hapon.

Ayon kay AFP-Western Mindanao Command Spokesperson, Captain Rowena Mu­yuela, bandang alas-3 ng hapon ng yanigin ng malakas na pagsabog ang nasabing lugar.

Sinabi ni Muyuela na ang nasawi ay binawian ng buhay sa ospital.

Sa inisyal na impormasyon ng mga awtoridad, posibleng sa isang nakaparadang kotse nagmula ang pagsabog kung saan nadamay ang iba pang mga sasakyan.

Sa nasabing insidente ay nawasak din ang malaking bahagi ng ilang mga establi­s­yemento sa lugar. Inaalam pa ng mga awtoridad kung anong uri ng bomba ang sumabog.