NUEVA ECIJA, Philippines – Napatay ang 50-anyos na magsasaka matapos na hatawin sa ulo ng kanyang kabaro na sinasabing namboboso sa kanilang bahay sa Purok Ipil-Ipil, Barangay Canantong sa bayan ng Laur, Nueva Ecija noong Sabado ng gabi.
Halos mabasag ang bao ng ulo ng biktimang si Julio “Butch” Ballesteros habang pinaghahanap naman ng pulisya ang suspek na si Alex “Jumong” Basilio, 31, kapwa magsasaka at nakatira sa nasabing barangay.
Lumilitaw na kinompronta ng biktima ang suspek kaugnay sa ginagawa nitong pamboboso sa kanyang asawa at anak na dalaga sa kanilang bahay.
Gayon pa man, nagkainitan ang dalawa hanggang sa bumunot ng dalang karit ang biktima saka sinunod at initak ang suspek.
Nagawa namang makailag ng suspek nang mahawakan nito ang kamay ng biktima hanggang sa mawalan ng balanse at mahulog sa lupa.
Dito nakatiyempo ang suspek na nakatayo saka pinalo sa ulo ang biktima gamit ang homemade dumbbell.