Magpinsan niratrat sa peryahan

CAVITE, Philippines – Napatay ang 25-anyos na lalaki habang kritikal naman ang pinsan nito makaraang pagbabarilin ng mga senglot na kalalakihan na kanilang nakaalitan sa peryahan kamakalawa ng gabi sa Barangay Maguyam, bayan ng Silang, Cavite. Kinilala ng pulisya ang napaslang na si Bernard Reymundo habang malubha naman si Edwin Reymundo, 26, kapwa nakatira sa Barangay San Gabriel, bayan ng General Mariano Alvarez, Cavite. Sa imbestigasyon ni P03 Jose Ilano, paalis na sa peryahan ang magpinsan nang harangin at komprontahin ng apat na kalalakihan na kanilang nakaalitan hanggang sa umabot sa pamamaril. Napag-alamang mga lango sa alak ang gunmen at ang magpinsan nang mag-away sa peryahan bago maganap ang pamamaslang.