MANILA, Philippines - Sa loob lamang ng 24 oras, matagumpay na nasagip ng mga operatiba ng pulisya ang dinukot na 12-anyos na batang lalaki habang dalawa namang kidnapper ang nasakote sa rescue operation sa Samal, Bataan kahapon ng madaling-araw.
Kinilala ni Police Regional Office (PRO) 3 Director P/Chief Supt. Raul Petrasanta ang mga nasakoteng suspek na sina Freddie Aguilar, tukayo ng sikat na singer at Alvin Samar.
Ayon kay Petrasanta, ang mga suspek ang responsable sa pagbihag sa biktimang itinago sa pangalang Jomar sa pakiusap na rin ng pamilya nito na dinukot sa isang eskuwelahan sa Sto. Cristo, Concepcion, Tarlac nitong Biyernes.
Bandang alas-2:30 ng madaling-araw, ayon kay Petrasanta nang lusubin nila ang pinagtataguan ng mga suspek sa bata sa Brgy. Hugo, Samal, Bataan.
Inihahanda na ang pagsasampa ng kasong kriminal laban sa mga nasakoteng suspek.