RIZAL, Philippines – Nauwi sa pangho-hostage ang bigong panghoholdap ng 34-anyos na lalaki sa mga pasahero ng jeepney sa bayan ng San Mateo, Rizal kahapon ng umaga. Arestado ang suspek na si Kenneth H. Tavas, tubong La Union habang nailigtas naman ang biktimang 17-anyos na itinago sa pangalang Diane. Base sa police report, sakay ng pampasaherong jeepney ang suspek na patungo sa bayan ng Rodriguez nang magdeklara ito ng holdap pagsapit sa General Luna Street, Barangay Ampid I. Gayon pa man, namataan ng isang concerned citizen ang insidente kaya naipaabot sa pulisya kung saan kaagad na rumesponde ang grupo ni P/Inspector Kathleen Sanchez. Nang makita ang mga pulis ay hinostage ni Tavas ang biktima kung saan sa maikling negosasyon ay nahikayat naman ni SPO4 Joselito Guillermo na sumuko ang suspek.