Kabacan, North Cotabato, Philippines – Kulungan ang bagsak ng dalawang karnaper makaraang masakote ang mga ito sa isinagawang hot pursuit operation sa bahagi ng Brgy. Kilagasan, Kabacan, Cotabato, kahapon ng umaga. Kinilala ng Kabacan PNP ang mga naaresto na sina Mongkoy Guialil Pigcualan, 19 at ang isa pang kasama nito na si Bayan Mantawil, 19. Batay sa inisyal na ulat, alas-9:00 ng umaga kahapon nang tutukan ng baril ng dalawang suspek sa bahagi ng Bonifacio St., ang isang Roderick Castillo Orbillo, 35, negosyante at puwersahang kinuha ang kanyang kulay pulang Honda Beat na may license plate 9412 QN. Agad namang tumakas ang mga suspek sa direksiyong papuntang Kilagasan. Dahil dito, agad na naglatag ng operasyon ang mga awtoridad kung saan naaresto ang mga suspect.